Psa 46 | PMA | STEP | Ahi vi keihoen ka vi out tatosuaien orer, sak mese lises vakataunir en avong takeih.

Psalms 46

Ahi ten Keihoen Mul Venir

1 Ahi vi keihoen ka vi out tatosuaien orer,
sak mese lises vakataunir en avong takeih.
2 Sakini, rehermetautei,
heisavos munak alu houlul ka vatihou keil imaru iha en huinev ten atas.
3 Rehermetautei munak atas hevuvu, helohloh ka hemavul,
ka sakin atan ka vatihou keil akulul.

4 En meteimal onen Ahi, ^{▼▼46:4 Deved mul selus usil Serusalem, ka en Revelesen 22:1-2, Sion mul selus usil out nesa.}
oaisal tai mue luhu eni.
Oaisal enek sakin meatin keil en out enek asi keil.
Out enek vi out votut onen Ahi keke loh lin tounah sav keil.
5 Ahi varei mul en meteimal enek,
sakini asakras avou rasil lini.
Anatin, en visokon semau, hemai hesan kataunien min koakeil aro ien.
6 Ahi hesel hesuval voulul,
ka ren hesakin atan hemasil.
Hesakini, meatin keil ten out netan isil,
ka keihoen onen asuv houlu keil hemerangli.

7 Iahova, Asuv Houlu ten Out Nesa, mul venir.
Ahi onen Siekob vi out tatosuaien orer.

8 Mihemai, miheles asa koa Ahi Asuv mumoni.
Miheles marmari tounah keil koa mumoni en out netan.
9 Huhuen keil ten out netan, kei mumoni evus varei.
Kum vulvul hisuput keil ka ai takan keil emun.
Ka ai keil tatosuaien, Ahi munit lini.
10 Ahi viteni min keil vit, “!Mihehat kami! !Miheilea keke inau navi Ahi!
!Keihoen onen asuv keil ten out netan mules en hek!
Ka moulien onen tounah vasi keil ten out netan emun mules en hek.”

11 Iahova, Asuv Houlu ten Out Nesa, mul venir.
Ahi onen Siekob vi out tatosuaien orer.